Alla Itolae Nusa 39
Hoko Potipare isabe Yusupe bei tamata maka abeli rebe isabe Yusupe bei kwalinisi me Dotane rebe esi kerini lopai Mesire.
Hoko irue kai Potipare tamata Mesire mere po TUHANE Itapai hoko saisa rebe Yusupe ikerikele Ionoe emise.
Eleki Potipare irekwa be TUHANE Itapa Yusupe le pusue eni makerikaru umise.
Hoko Potipare ilalei ndinake Yusupe eleki iriluke kbasa etei kena iraka luma kai eni tanei maketaru pusulu.
Kena Potipare iriluke kbasa ete Yusupe hoko TUHANE Iono Potipare eni lumatoini supu misete me luma lalei le bei Yusupe.
Pusue Potipare eni taneiaru iriluke kbasa ete Yusupe kena ili lokolu hoko Potipare ili lokolu moneka. Po batuke Potipare eni manane Yusupe ikerike mo.
Yusupe inteki kai imise kuate.
Eleki takwali mo petu sae me Potipare eni bina lalei loko Yusupe hoko ibeteke loko Yusupe be,
“Mai antulu kai au mina.”
Po Yusupe ilene lokoi mo hoko ibeteke loko Potipare eni bina be,
“Au tapa Potipare kena au kbasae luma kai taneia mei luma meije pusulu eti ili lokolu moneka,
hoko mei luma meije Potipare eni tamata maka kerike esi kbasare lesi bei au mo kai pusue eni taneiaru iriluke kbasa ete au po rebe iriluke ete au more ale le eni bina. Hoko mise mo le au ono sala elake ete Potipare kai ono dosa ete auku Alla.”
Masike pela petu Potipare eni bina iumauke Yusupe kena ntulu tehaikeni leke sablia kaini po Yusupe isuka mo.
Kena petu sae me Yusupe ikusu mpai luma lalei kena ikerike eni makerike kena mere tamata rebe kerike ete Potipare sae mo batuke Potipare eni bina ruai.
Eleki Potipare eni bina ikerike Yusupe eni lapune bei me mulini eleki ibeteke lokoi be,
“Mai ntulu kai au.”
Po Yusupe inaya bei eni lapune me Potipare eni bina balaije lopai muli.
Potipare eni bina iselu Yusupe inaya bei eni lapune kena balaije,
eleki Potipare eni bina ikoti eni tamata makerike mokwaiyaru eleki ibeteke be,
“Mai selu! Tamata Ibrani iklemake ite. Tamata mere itehaike au kena intulu kai au po au biuwe ktili titinai.
Po kena ilene au biuwe ktili kuate eleki inaya bei eni lapune kena leiku eleki isiri lopai muli.”
Eleki Potipare eni bina itolae Yusupe eni lapune kena leine eti eti Potipare ileu.
Lepate mere ialenake suike ete Potipare be,
“Tamata maka ulake bei Ibrani rebe alikui lomeije iluake lokoku kena iklemake au.
Po au kloloe eleki inaya bei eni lapune mei leuke eleki inaya lopai muli.”
Kena Potipare ilene eni bina ibeteke be tamata maka ulake iono ele mere, inasu titinai.
Potipare ikerike Yusupe eleki kusuini kena bui, otoi kena tamata rebe ono sala ete Kamale kusu kenare. Bui mere bui elake mpe tape lebui me Potipare eni luma.
Po TUHANE Irakai kai Iriluke misete etei hoko Iono buije esi elake laleije suka Yusupe.
Hoko masike Yusupe tamata bui sa po buije esi elake iriluke kbasa ete Yusupe kena iraka pusue tamata me bui lalei rebe esi kusu bui kaine kai pusue makerike rebe me bui laleije isekake lokoe.
Eleki buije esi elake iraka kai selu Yusupe moneka kena kerike yelu rebe iriluke kbasa ete Yusupe le TUHANE Iraka Yusupe kai saisa rebe Yusupe ikerikele TUHANE Ionoe supu misete.